.
AFFA-nın Lisenziyalaşdırma Qrupunun rəhbəri Elçin Məmmədov UEFA Çempionlar Liqasının qrup mərhələsi çərçivəsində keçiriləcək BATE (Belarus) - "Roma" (İtaliya) oyununun direktoru kimi təyinat alıb.
AFFA-dan AzərTac-a bildiriblər ki, qarşılaşma sentyabrın 29-da Borisov şəhərində eyni adlı stadionda keçiriləcək.
 
.
Belçika və Niderlandda qadın voleybolçular arasında Avropa çempionatının final mərhələsi davam edir.
"Report" xəbər verir ki, “B” qrupunda yer alan Azərbaycan millisi Antverpen şəhərində ev sahibi Belçika ilə qarşılaşıb.
Komandanın qrupda ikinci oyunu da məğlubiyyətlə nəticələnib - 0:3 (25:17, 25:20, 27:25).
“B” qrupa hesabında 6 xalı olan Belçika liderlik edir. Türkiyə millisi 3 xalla ikinci yerdədir. Aktivlərində xal olmayan Azərbaycan və Macarıstan yığmaları isə üçüncü, dördüncü yerləri bölüşür.
İndi Azərbaycan millisi pley-off mərhələsinə yüksəlmək üçün Macarıstan yığmasına qalib gəlməlidir.
Qrupda sonuncu qarşılaşma sentyabrın 28-də keçiriləcək.
.
"Barselona"nın futbolçusu Lionel Messi zədələnib.
Argentinalı hücumçu La Liqada "Las Palmas"a qarşı matçda sıradan çıxıb. 8-ci dəqiqədə sol dizindən problem yaşayan L.Messi məcburi əvəzlənməli olub.

Ulduz futbolçu 6 ay yaşıl meydanlara çıxmayacaq. /Azvision.az/
.
Bu gün Azərbaycan Premyer Liqasında VI tura start verilib.
İlk oyun günündə iki qarşılaşma keçirilib. “İnter” öz meydanında “Kəpəz”i qəbul edib. Qarşılaşma "İnter"in minimal hesablı qələbəsi ilə başa çatıb - 1:0.

Günün digər görüşündə “Rəvan” Avropa Liqasının qrup mərhələsində mübarizə aparan “Qəbələ”ni qəbul edib. Bu oyunda Roman Qriqorçukun komandası 3:0 hesabı ilə qalib gəlib.

Turun digər oyunları sentyabrın 26-27-də keçiriləcək.
/AzVision.az/
.

Bir vaxtlar "Samsunspor" futbol klubunun və Türkiyə milli komandasının da formasını geyən Uğur Dağdelen Amasyanın Merzifon İrayonundakı evində tapançayla özünü başından vuraraq intihar edib.

Türkiyə mediasının verdiyi xəbərə görə, 1995-2001-ci illər arasında "Samsunspor" forması geyən futbolçu Uğur Dağdelen Mehmetçik prospektindəki evinin qarajında özünü vurub.

Saat 18:00 sıralarında evə gələn yaxınları Dağdelenin cansız bədənini tapıb. Prokurorun təlimatıyla Dağdelenin cənazəsi evindən alınaraq yarılmaq üçün xəstəxanaya göndərilib. Hadisə ilə əlaqədar polis tərəfindən istintaq başladılıb.

Qeyd olunur ki, Uğur Dağdelen "Merzifonspor"daki müvəffəqiyyətinin ardından "Kardemir Karabükspor"a transfer olub. 1994-95-ci mövsümünü "Bursaspor"da keçirən qolçu oyunçu 1995-96-cı il mövsümündə "Samsunspor"a keçib. Kirayə olaraq "Kayserispor"da keçirdiyi 1997-1998 mövsümü xaricində 2001-ci ilə qədər "Samsunspor"da oynayan Dağdelen 29 yaşında ikən futbolu tərk edib (musavat.com).

.

Bu gün UEFA Avropa Liqasının qrup mərhələsinin ilk oyunları keçiriləcək.

Apasport.az saytının məlumatına görə, təmilçimiz “Qəbələ” də ilk oyununa çıxacaq. Tarixində ilk dəfə Avroliqanın qrupuna düşən milli çempionatınımızın bürünc mükafatçısı bu mərhələnin ilk oyununda öz meydanında Yunanıstanın PAOK klubu ilə qarşılaşacaq.
Qrup mərhələsinə qədər “Dinamo” (Gürcüstan), “Çukariçki” (Serbiya), “Apollon” (Kipr) və “Panatinaikos” (Yunanıstan) klublarını mübarizədən kənarlaşdıraraq təsnifat mərhələsində uğurlu çıxış göstərən “Qəbələ” eyni uğuru qrup mərhələsində də davam etdirmək niyyətindədir.Təmsilçimizin heyətində zədəli Rafael Santosun yoxluğu ciddi itki hesab oluna bilər. Əvəzində isə yeni transferlər, elə PAOK-dan transfer edilmiş Fakundo Pereyra və “Xəzər Lənkəran”dan icarəyə götürülmüş Vaqif Cavadov baş məşqçinin şans verəcəyi təqdirdə oynaya biləcəklər.
Çempionumuz “Qarabağ” isə Londonda “Tottenhem”in qonağı olacaq. Artıq ardıcıl ikinci dəfə bu mərhələdə çıxış edən ağdamlılar bu cəhdlərində ötənilki nəticəsini yaxşılaşdırmaq üçün oynayacaq. Şübhəsiz ki, “Qarabağ”ın rəqibi çox güclüdü. Üstəlik, səfər amili “Qarabağ”ın işinin çətin olacağını təsdiqləyir.
Uzun müddətdi zədən səbəbindən yaşıl meydanlardan uzaq düşən Maksim Medvedevin sıraya dönməsi və oynamağa hazır olması Qurban Qurbanovun “əlini gücləndirən” amillərdəndir. Heç vaxt bu qədər geniş heyətlə oynamayan Ağdam klubunda yeni transferlər Miçel və Armenteros da şans veriləcəyi təqdirdə özlərini göstərə biləcəklər.
UEFA Avropa Liqası
Qrup mərhələsi, I tur
17 sentyabr
22:00. “Qəbələ” (Azərbaycan) – PAOK (Yunanıstan)
Bakı. “Bakcell Arena”.
00:05. “Tottenhem” (İngiltərə) – “Qarabağ” (Azərbaycan)
London. “Uayt Hart Leyn”.
.
“Yaxın planlarıma rus dilini öyrənmək və Krımda bağ evi tikdirmək daxildir”. 
Modern.az-ın məlumatına görə, bu sözləri məşhur amerikan boksçusu, bu gün Rusiya vətəndaşlığını almış Roy Cons yerli mətbuata deyib. Boks üzrə  dünya çempionu Roy Cons bu ilin avqust ayında Rusiya vətəndaşlığını almaq üçün ərizə vermişdi.
Bu gün Rusiya prezidenti Vladmir Putin ona vətəndaşlıq verilməsi ilə əlaqədar xüsusi fərman imzalayıb. 
Bu, Rusiya vətəndaşlğını qəbul etmiş yeganə məşhur deyil. İki il öncə məşhur fransız aktyoru  Jerar Depardye də bu addımı atmışdı.
.
Azərbaycan I Divizionunun ilk turunun daha 3 oyunu keçirilib. İlk turun ikinci oyun günündə qarşılaşmaların birində yaşıl meydanlarda nadir hallarda rast gəlinən hesab qeydə alınıb. “Neftçala” səfərdə “Energetik”i meydana çıxmağına peşman edib – 12:0.
 
Digər oyunlardakı nəticələr aşağıdakı kimidir.
 
“Şəmkir” - “Turan Tovuz” – 3:0
Qollar: İlham Alahverdiyev, 29, 43; Sərxan Ağayev, 90+1
 
“Energetik” - “Neftçala” – 0:12
Qollar: Fərmayıl Əliyev, 19; 31, 36; David Janelidze, 24 (p.), 49, 85, 88; Aqşin Muxtaroğlu, 41; Məhəmməd Xəlilov, 50, 60; Anar Babayev, 77, Mübarək Şahquliyev, 90
 
“Şahdağ” – MOİK – 1:1
Qollar: Vurğun Həsənzadə, 87 - Bayram Kərimov, 90+2 (p.)

Xezerxeber.com
.
ABŞ-ın Las Veqas şəhərində güləş üzrə Dünya Çempionatı davam edir.
AzVision.az xəbər verir ki, 4-cü yarış günündə qadın və kişi sərbəst güləşçiləri 4 çəki dərəcəsində yarışıblar. Azərbaycan güləşçiləri Yuliya Ratkeviç (58 kq) və Toğrul Əsgərov (65 kq) növbəti lisenziyaları əldə ediblər. 

Olimpiya çempionumuz Toğrul Əsgərov ilk olaraq Qazaxstanlı Sayatbek Okassov, ardınca Ermənistan təmsilçisi Devid Safaryan və Gürcüstan idmançısı Avtandil Kençadzeni mübarizədən kənarlaşdıran güləşçimiz 1/4 finalda İtaliya idmançısı Frank Çamizo ilə qarşılaşıb. Bu güləşçi ilə Toğrul ilk dəfə birinci Avropa Oyunlarının finalında qarşılaşmışdı və güləşçimiz təmiz qələbə ilə qalib gəlmişdi. Bu dəfə də görüşün 30-cu saniyəsində Toğrul rəqibinin kürəyini xalçaya sıxa bildi. Ancaq hakimlərin qeyri-obyektiv qərarı ilə görüş davam etdirildi, İtaliya idmançısının qələbəsinə və finala yüksəlməsinə şərait yaradıldı. Toğrul Olimpiadaya vəsiqəni qazanmaq üçün təsəlliverici görüşə qatıldı. Polşa təmsilçisi Maqomedmurad Qadjiyevlə görüşdə əldə etdiyi üstünlük güləşçimizə Rio Olimpiadasının yolunu açdı. Toğrul Əsgərov Dünya çempionatının bürünc medalı uğrunda İran təmsilçisi Seyidahmed Mohammadi ilə qarşılaşıb, ancaq görüş rəqibin xeyrinə başa çatıb və güləşçimiz Dünya çempionatını 5-ci sırada tamamlayıb. 

Xatırladaq ki, bundan əvvəl Yunan-Roma güləşçilərindən Rövşən Bayramov (59 kq), Elvin Mürsəliyev (75 kq), Saman Təhmasibi (85 kq) və Sabah Şəriəti (130 kq), qadın güləşçilərdən Mariya Stadnik (48 kq) və Anjela Doroqan (53 kq) Olimpiya lisenziyaları əldə edib. Rəsul Çunayev (71 kq) dünya çempionu olub, Rövşən Bayramov (59 kq) gümüş, Saman Təhmasibi (85 kq) bürünc medala layiq görülüb.

Qeyd edək ki, lisenziya qazanmaq üçün idmançılara ilk beşliyə düşmək gərəkdir.
.
Amerika Birləşmiş Ştatlarının Las Veqas şəhərində 2016-cı ildə Braziliyanın Rio-de Janeyro şəhərində keçiriləcək XXXI Yay Olimpiya Oyunlarına ilk lisenziyaların qazanıldığı güləş üzrə Dünya çempionatı davam edir.
Azərbaycan Güləş Federasiyasından (AGF) "Xəzər Xəbər"ə verilən məlumata görə, ilk iki yarış gününün yekunlarına əsasən, güləşçilərimizdən Rövşən Bayramov (59 kq), Elvin Mürsəliyev (75 kq) və Sabah Şəriəti (130 kq) Olimpiya Oyunlarına vəsiqə əldə edib.
İkinci yarış günündə 59, 71, 80 və 130 kq çəki dərəcələrində qaliblər müəyyənləşib. Güləşçilərimiz günü 1 qızıl və 1 gümüş medalla başa vurub.
59 kq çəki dərəcəsində mübarizə aparan Olimpiya Oyunlarının ikiqat gümüş medalçısı və Dünya çempionu Rövşən Bayramov inamla güləşərək finala yüksəlib. Final yolunda güləşçimiz Hindistanlı Singh Ravinder üzərində asan, Şimali Koreyadan Von Çol Yun üzərində çətin qələbə qazanıb. 1/4 finalda London Yay Olimpiya Oyunlarının final görüşündə məğlub olduğu Hamid Mohammad Soryanla qarşılaşan Rövşən Bayramov vaxtından əvvəl görüşü qələbə ilə başa vurub. Buna səbəb, həm də İranlı güləşçinin görüş zamanı qaydalara zidd olaraq rəqibinə başla ardıcıl zərbələr endirməsi olub. Hakimlərin yekdil qərarı isə, Rövşən Bayramovu yarımfinala yüksəldib. Bu qələbə ilə güləşçimiz 2016-cı il Rio Olimpiadasına vəsiqəni də təmin edib. Yarımfinalda Rövşən Qırğızıstanlı Arsen Yeraliyevi mübarizədən kənarlaşdıraraq karyerasında üçüncü dəfə Dünya çempionatının finalına yüksəlib. Finalda güləşçimiz Kubalı rəqibi İsmael Borrero Molinaya uduzub və Dünya çempionatının gümüş medalına sahib olub.
İlk Avropa Oyunlarının qalibi və 71 kq çəkidə mübarizə aparan Rəsul Çunayev ötən mundialı bürünc medalla başa vurmuşdu. Bu dəfə güləşçimiz finala qədər yüksələ bilib. İlk olaraq Monakdon Frank Hassli üzərində qələbə qazanan Rəsul, ardınca Rusiya təmsilçisi Adam Kuraka heç bir şans verməyib. Yerli azarkeşlərin güclü dəstəyinə rəğmən ABŞ təmsilçisi Justin Daşaun Lesteri də tam üstünlüklə məğlub edən Rəsul yarımfinala yüksəlib. Finalın bir addımlığında Belarus güləşçisi Tsimur Berdiyevi də tam üstünlüklə məğlub edən Rəsul Çunayev adını finala yazdırıb. Finalda güləşçimiz Ukrayna təmsilçisi Armen Vardanyana qalib gələrək Dünya çempionatının qızıl medalına sahib olub.
2016-cı il Rio Olimpiadasına daha bir vəsiqəni 130 kq çəkidə mübarizə aparan Sabah Şəriəti qazandırıb. İlk görüşündə Macarıstandan Balint Lam üzərində qələbə qazanan Sabah, 1/4 finalda Venesueladan Ervin Jose Caraballo Cabreranı mübarizədən kənarlaşdırıb. Yarımfinala yüksələn güləşçimiz həm də Rio Olimpiadasına 3-cü vəsiqəni əldə edib. Yarımfinalda Türkiyə təmsilçisi Rıza Kayaalpa məğlub olan Sabah Şəriəti bürünc medal şansını saxlayıb. Ancaq həlledici görüşdə Ukrayna Oleksandr Çernetskiyə məğlub olan güləşçimiz Dünya çempionatını beşinci sırada tamamlayıb.

Xəbər lenti