.
Millət vəkili Qənirə Paşayeva  Ramazan bayramı münasibəti ilə ön cəbhədə yerləşən Ağdam kəndində müəllimlər və  sakinlərlə görüşüb, onların bayramlarını təbrik edib. Millət vəkili Qənirə Paşayeva Ağdam və Vahidlidə kəndində müəllimlərlə, şagirdlərlə və sakinlərlə görüş zamanı Ramazan ayının bir yardımlaşma, paylaşma, dəstək ayı olduğunu vurğulayaraq onlara Allahdan bütün dualarına çatmalarını diləyib, qayğı və problemləri ilə maraqlanıb. Ramazan Bayramı münasibətilə müəllimləri və bir sıra sakinləri öz hədiyyələri ilə təbrik edən millət vəkili Qənirə Paşayeva ön cəbhədə yaşayan ziyalıların, insanlarımızın fədakarlıqlarından, vətən və torpaq sevgisindən danışıb. Millət vəkili Q.Paşayeva müəllimlərin qayğı və problemləri ilə də maraqlanıb. Yaxşı oxuyan şagirdləri də bayram münasibəti ilə təbrik edən millət vəkili Q. Paşayeva həmçinin kənd sakinləri ilə də görüşüb, bayramlarını təbrik edib.  Ön cəbhə kəndlərinin qəhrəman kəndlər olduğunu söyləyən millət vəkili Qənirə Paşayeva kənd sakinlərinin müharibənin ən gərgin dövründə də, bu gün də düşmənin bütün təxribatlarına baxmayaraq heç bir zaman öz evlərini tərk etməməsini, bununla da düşmənə ən layiqli cavab verməsinin hər kəs tərəfindən yüksək qiymətləndirildiyini bildirib.  Millət vəkili Qənirə Paşayeva kəndə səfər zamanı sakinləri  dinləyərək, onları narahat edən problemlərlə bağlı qeydlər apararaq, həll edilməsi istiqamətində köməklik göstərilməsinə çalışacağını bildirib. Millət vəkili onların bəzi problemlərinin həlli istiqamətində müvafiq qurumlarla danışacağını və onların bəzi təkliflərini parlamentdə səsləndirəcəyini deyib. Qənirə Paşayeva seçiciləri narahat edən bir sıra digər məsələləri də dinləyib və onların bəzilərini rayonda həll edib, bəzi dövlət qurumları ilə bağlı məsələləri isə Bakıya qayıdan kimi həll etməyə çalışacağına söz verib. Sakinlər millət vəkilindən xahiş ediblər ki ön cəbhə olan Ağdam kəndi yolunun vəziyyəti pisdir və onun düzəldilməsi üçün təkrar lazımi qurumlara müraciət etsin. Millət vəkilinin bununla bağlı müraciətlər etdiyini bildiklərini və bunun üçün təşəkkürlərini bildirən sakinlər məsələnin öz həllini tapması üçün Qənirə Paşayevadan təkrar bu məsələni dövlət qurumları qarşısında qaldırmasını xahiş ediblər. Bununla bağlı bir neçə dəfə müvafiq qurumlara müraciət etdiyini deyən millət vəkili Q.Paşayeva Bakıya dönən kimi hökumətə ön cəbhə sakinlərinin bu xahişi ilə bağlı təkrar müraciət edəcəyini vurğulayıb. O bildirib ki,  doğurdanda Ağdam yolunun təcili düzəldilməsinə ehtiyac var və ümid edir ki, məsələyə yaxın zamanlarda baxılacaq. Millət vəkili Q.Paşayeva həmçinin Vahidli kəndinin bir sıra sakinləri ilə görüşüb, Ramazan bayramlarını  təbrik edib, qayğı və problemləri ilə maraqlanb, həll istiqamətində müvafiq qurumlarla danışıb və addımlar atılıb.  Sakinlərlə görüşdə millət vəkili Qənirə Paşayeva Milli Məclisdə qəbul olunan qərar və qanunlardan, qanunlara edilən əlavə və dəyişikliklərdən danışıb, seçicilərini maraqlandıran və narahat edən məsələlərin tərəfindən araşdırılacağını bildirib.
.
Özünü bank sahəsində ekspert kimi təqdim edən Əkrəm Həsənov banklarda faktlarla təsdiq olunmayan cinayət əməllərinin olması barədə əsassız iddialar irəli sürərək əmanətçiləri banklarda olan vəsaitlərini geri götürməyə çağırışlar etməklə əhali arasında ajiotaj yaradan, banklardan əmanətlərin qaçışına, likvidlik problemlərinin yaranmasına və nəticə etibarı ilə maliyyə sistemində arzuolunmaz hallara səbəb olma ehtimalı yaratdığından Baş prokuror yanında Korrupsiyaya qarşı Mübarizə Baş İdarəsinə dəvət edilib.
Baş Prokurorluğun mətbuat xidmətindən Unikal.org-a verilən məlumata görə, "Prokurorluq haqqında” Azərbaycan Respublikası Qanununun tələblərinə müvafiq olaraq bankların işgüzar nüfuzuna xələl gətirən, qərəzli informasiyaların yayılmasına son qoyulması tələb edilməklə, gələcəkdə oxşar məzmunlu açıq çağırışlar edəcəyi, habelə bu qəbildən olan məlumatların ictimailəşdirilməsini davam etdirəcəyi təqdirdə barəsində qanunvericilikdə nəzərdə tutulmuş daha ciddi tədbirlər görüləcəyi barədə rəsmi xəbərdarlıq edilmişdir.
Hazırda Ə.Həsənov tərəfindən bank sahəsində aparılan islahatlara kölgə salmaq məqsədi güdən qeyd olunan əsassız fikir və məlumatların yayılmasının məqsədinin müəyyənləşdirilməsi istiqamətində araşdırmalar davam etdirilir.
.
Evrostroy-S” MMC yeni inşa olunan yaşayış evlərindən AMEA-ya əvəzsiz olaraq ümumi sahəsi 8000 (səkkiz min) kvadratmetr yaxın olan mənzillər ayırmağı öhdəsinə götürüb. Bu mənzillərin çox hissəsi ayrılıb, qalanının isə yaxın vaxtlarda ayrılmasına yazılı zəmanət verilib.
Axar.az xəbər verir ki, bunu AMEA-nın İşlər İdarəsinin müdir müavini Sərdar Əliyev deyib. O bildirib ki, mənzillərin bölüşdürülməsinə hazırlıq məqsədilə AMEA Rəyasət Heyətinin 7 dekabr 2016-cı il tarixli 5/2 nömrəli qərarı ilə, AMEA-nın vitse-prezidentinin rəhbərliyi ilə yeni komissiya yaradılıb: “Komissiyaya müqaviləyə əsasən, Bakı şəhəri, Yasamal rayonu, Şərifzadə küçəsi, 12 ünvanında yerləşən yataqxananın ərazisində yeni inşa edilən binalardan AMEA-ya ayrılmış mənzillərə həmin yataqxanada yaşayan və AMEA-da işləyən elmi işçilərin köçürülməsi məsələsinin ətraflı araşdırılması tapşırılıb. Araşdırma zamanı məlum olub ki, yataqxanada qeydiyyatda olub yaşayan və ya adına otaq olub yaşamayan 107 ailə var. Onlardan 71 ailə AMEA-da işləyən, 36 ailə isə AMEA-da işləməyənlərdir. AMEA-da işləyən 71 ailədən 6-sı elmlər doktoru, 45-i isə fəlsəfə doktorudur. Bunlardan əlavə AMEA-da işləyən 48 əməkdaşın ailəsinin də (onlardan 34-ü fəlsəfə doktoru, 1-i elmlər doktorudur) 20 ildən artıq müddətdir ki, yataqxanada qeydiyyatda olduğu, lakin boş otaq olmadığına görə orada yaşamadıqları müəyyən edilib. Bu əməkdaşlar da mənzil almağa iddialıdırlar. Onlar hesab edirlər ki, uzun illərdir kirayələrdə yaşamaq məcburiyyətində qaldıqlarına görə yataqxanada yaşayanlardan daha çox maddi və mənəvi sarsıntılara məruz qalıblar. Hazırda onların da sənədləri araşdırılır. Komissiya tərəfindən yataqxanada yaşayan hər bir AMEA əməkdaşının yaşayış şəraitini və mənzilə olan ehtiyacını təsdiq edən sənədlər toplanıb. Kənarda yaşayış sahələri olması barədə məlumat daxil olan ailələrin yataqxanadan kənarda yaşadıqları mənzillər yerində, mənzil istismar sahələrinin işçiləri ilə birlikdə yaranmış imkanlar daxilində araşdırılıb. Yuxarıda qeyd edilən 71 AMEA əməkdaşından 17-sinin mənzil almağa hüququnun olması məsələsində problemlər yarandığını təsdiq edən sənədlər və məlumatlar toplanıb. Qalan 54 ailənin isə mənzil almağa hüququ olduğu müəyyən edilib. Həmin 17 ailənin adına otaqlar olsa da, əsasən həmin otaqlarda yaşamayan, adlarında mənzillər olmuş, yataqxananın yanında yaşayış evi tikintisi başlayandan sonra adlarında olan mənzilləri özgəninkiləşdirənlərdir. Yoxlama zamanı bu ailələrin əksəriyyətinin özgəninkiləşdirdikləri mənzillərdə yaşadıqları və ya həmin mənzilləri kirayəyə verərək başqa ünvanlarda yaşadıqları məlum olub. Bəzilərinin isə yeni binalarda mənzillərinin olduğu, lakin öz adlarına sənədləşdirmədikləri müəyyən edilib”.
 
S. Əliyevin sözlərinə görə, mənzil qanunvericiliyinə əsasən həmin ailələr mənzil alarkən, yataqxanadakı otaqları boşaldaraq təhvil verməli idilər və həmin otaqlar 20 ildən artıqdır ki, qeydiyyatda olan, boş otaq olmadığına görə kirayələrdə yaşayan elmi işçilərə verilməli idi: “Odur ki, ilk növbədə həmin 54 ailənin mənzillə təmin edilməsi məsələsinə baxılması məqsədəuyğun sayılıb. Ondan əlavə komissiya təklif etmişdir ki, mənzillərin bölüşdürülməsi üçün AMEA Azad Həmkarlar İttifaqı Təşkilatının iştirakı ilə yeni tərkibdə komissiya yaradılması məsələsinə baxılsın. 13 iyun 2017-ci ildə püşkatma yolu ilə 54 mənzilin bölgüsü aparılıb və hazırda sənədləşmə işləri davam etdirilir. Mənzil bölgüsü zamanı əməkdaşların elmi dərəcəsi, ailə vəziyyəti və ailədə imtiyaz verən digər hallar nəzərə alınıb. Nəzərə almaq lazımdır ki, bölgüsü gedən mənzillər 16 mərtəbəli yaşayış evinin 1-9-cu mərtəbəsində yerləşir. Yaşayış evinin tikintisi layihələşdirilərkən mənzil alan ailələrə uyğun xüsusi layihə olmadığından, hər mərtəbədə olan 1 otaqlılar 66 kvadrat metr, 5 ədəd 2 otaqlılar isə 85-113 kvadrat metr arasındadır. Böyük sahəli 2 otaqlı mənzillər ailə tərkibi 4 və 5 nəfərdən ibarət, elmi dərəcəsi olan əməkdaşlara verilmişdir. Qalan otaqların bölgüsü zamanı istər-istəməz normadan artıq sahə almış elmi işçilər də olmuşdur. Bütün bunlara baxmayaraq, mənzil alanlardan da mərtəbəsinə və səmtinə görə narazı qalanlar var. Bölgüdən narazı olanların müraciətləri qəbul edilir və hər bir müraciət fərdi qaydada araşdırılaraq cavab veriləcək. Son günlər yataqxanada yaşayan və mənzil almayan sakinlər yığışaraq respublikanın rəhbər orqanlarına getmiş, AMEA-nın rəhbərlərinin qarşısını kəsməyə çalışıblar. Bu məsələ ilə əlaqədar AMEA Rəyasət Heyətinin inzibati binasının qarşısına toplaşmış 30-a yaxın şəxs qəbul edilmək istəmişdir. AMEA-nın rəhbərliyi tərəfindən onlara bildirilib ki, qəbul olunmaq üçün aralarından 4-5 nəfər seçsinlər və ya hamısı tək-tək qəbul olunsun. Lakin onlar bu təklifin heç birini qəbul etməmişlər. Müraciət edən bu şəxslər yuxarıda qeyd etdiyim kimi, AMEA-da işləməyən 36 ailənin və problemi olan 17 AMEA əməkdaşının ailə üzvləridir. Qəbul olunmaq istəyən AMEA əməkdaşlarına müraciət edərək bildirirəm ki, mənzil məsələsi elə bir sahədir ki, onun kollektiv qaydada araşdırılması və ümumi qaydada həlli mümkün deyil. Hər bir məsələ fərdi qaydada araşdırılmalı və həllinin mümkünlüyü müəyyənləşdirilməlidir.Yataqxanada yaşayan və AMEA ilə heç bir əlaqəsi olmayanlara isə dəfələrlə bildirilmiş və bu gün də bildirilir ki, onların mənzillə təmin edilməsi AMEA-nın imkanları xaricindədir. Odur ki, yaşadıqları otaqları boşaldıb təhvil verməlidirlər”.
.
Rusiyalı Azərbaycan əsilli sahibkar, AST Şirkətlər Qrupunun təsisçisi Telman İsmaylovun ABŞ-ın Las Veqas şəhərində yerləşən ümumi sahəsi 7 min kv.m olan ticarət mərkəzinə həbs qoyulub. 
Asiya.info APA-ya istinadən xəbər verir ki, həbs qərarı "Moskva Bankı"nın iddiası əsasında verilib.  Məlumata görə, hazırda T.İsmaylovun "Moskva Bankı" qarşısında borunun həcmi 19 mlrd. rubl təşkil edir. 
 
"Moskva Bankı ABŞ məhkəməsinə müraciət edərək kreditlər üzrə ödəmələri dayandıran və əldə etdiyi vəsaitləri ölkədən çıxararaq xarici ölkələrdə qohumlarının adına daşınmaz əmlak əldə edən Telman İsmaylovu dələduzluqda ittiham edib. Məhkəmə ticarət mərkəzinə həbs qoyaraq kreditorun iddialarını cavablandırmaq üçün cavabdeh tərəfə vaxt verib", - deyə bankın xəbərində bildirilir.    
 
Qeyd edək ki, Moskva vilayətinin Arbitraj Məhkəməsi bu ilin martında Telman İsmayılovu müflis elan edib.
 
Moskva məhkəmə onun əmlakının satışa çıxarılması proseduruna start vermişdi.
.
İyunun 21-də BMT-nin Ümumdünya Qaçqınlar Günü çərçivəsində Avropa Azərbaycan Cəmiyyətinin (TEAS) Fransa ofisinin təşkilatçılığı ilə Fransa Senatında “Avropa və Fransada unudulmuş münaqişələrin nəticələri: uzun müddətdir qaçqın və məcburi köçkün həyatı yaşayanların cari vəziyyəti və uzunmüddətli perspektivləri – Azərbaycan nümunəsi” adlı konfrans keçirilib. 
“Qafqazinfo” xəbər verir ki, konfrans Avropa Robert Şuman İnstitutu (IRSE) və “Paris-Ile-de-France” Müdafiə Araşdırmaları Ali İnstitutu (IHEDN) ilə birgə təşkil edilib. Tədbir Bas-Rhin regionunun senatoru və Fransa Senatında Fransa-Qafqaz Dostluq Qrupunun prezidenti Andre Reişarın himayəsi altında keçirilib. Konfrasa diplomatlar, ictimai-siyasi xadimlər, senatorlar, idmançılar, UNESCO və vətəndaş cəmiyyəti nümayəndələri də daxil olmaqla 50-dən çox iştirakçı qatılıb.  
Senator Reişar tədbirin açılışında çıxış edərkən deyib: “Bu gün ona görə əlamətdardır ki, azərbaycanlı köçkünlərə həsr olunan tədbir Fransa Senatında keçirilir. Azərbaycanda minlərlə insan Qarabağ münaqişəsi nəticəsində dogma ocağından didərgin olmuşdur. ATƏT-in Minsk Qrupunun Azərbaycan və Ermənistan arasında danışıqlar vasitəsilə sülhə nail olmaq üçün 20 ildən artıqdır ki, çalışmasına baxmayaraq, heç bir nəticə hasil olunmayıb. Fikrimcə, bu taleyüklü məsələ ilə beynəlxalq ictimaiyyət məşgul olmalıdır.  
 
IRSE təşkilatının prezidenti Yamina Benguigui: “IRSE təşkilatının məqsədi xalqlar arasında həmrəylik yaratmaqdır. Hazırkı miqrasiya böhranına görə Qərbi Avropada qaçqın və məcburi köçkün məsələlərinə daha çox diqqət yetirilir. Həmçinin, bir milyona yaxın azərbaycanlı məcburi köçkün və qaçqının probleminə də beynəlxalq nəzərlər artırılmalıdır. Hər iki ölkənin vətəndaş cəmiyyətlərinin yeni platformasına lazımi dəstək verilməlidir. Bu, konstruktiv dialoq üçün yeni imkanlar yaradır”. 
Avropa Azərbaycan Cəmiyyətinin Fransa ofisinin direktoru Marie-Laetitia Gourdin: Dəfələrlə beynəlxalq səviyyədə “Ermənistanın işğalçılıq siyasəti qınaq obyektinə çevrilib. Buraya, həmçinin, BMT Təhlükəsizlik Şurası, Avropa Parlamentinin qətnamələri və digər sənədlər də daxildir. Bugünkü konfransın basilica məqsədi bir tərəfdən geosiyasi kontekstin və Azərbaycanda yaşayan qaçqın və məcburi köçkünlərin ifadələrini təqdim etməklə, bu insanlar haqqında obyektiv məlumatlılığın artırılmasına nail olmaqdır. Digər tərəfdən isə münaqişənin həm diplomatik nöqteyi-nəzərdən, həm də vətəndaş cəmiyyətinin fəaliyyəti vasitəsi ilə ədalətli, sülh yolu ilə həlli üçün imkanlarını nəzərdən keçirməkdir.” 
Azərbaycanın Fransadakı fövqəladə və səlahiyyətli səfiri Elçin Əmirbəyov Ermənistanın təcavüzünün miqyasını nümayiş etdirən Azərbaycan xəritəsi fonunda çıxış edərək deyib: “Cənubi Qafqazda məcburi köçkün məsələsinin həll edilməsi həm Ermənistan, həm də Azərbaycanın marağındadır. Bu, Sovet İttifaqının süqutu zamanı yaranan unudulmuş münaqişədir. Hər həftə “təmas xətti”ndə əsgərlər öldürülür. Ermənistan Azərbaycanın mülki əhalisinə qarşı etnik təmizləmə siyasəti həyata keçirir”.  
Tədbir çərçivəsində tanınmış amerikalı jurnalist Tomas Qoltsun rejissorluğu ilə çəkilmiş “Offside” adlı sənədli filmin nümayişi də təşkil olunub. Filmdə “Qarabağ” Futbol Klubu haqqında bəhs edilir. Bu komanda Ağdamda yerləşən dogma stadionu 1993-cü ildə erməni işğalçıları tərəfindən zəbt edildiyi vaxtdan ev oyunlarını doğma meydançasından kənarda keçirir. Filmin nümayişindən sonra fransalı taekvondo ustası Paskal Gentil idmanın gücü haqqında danışıb. O, bu yaxınlarda Parisdə qaçqınlar üçün keçirilmiş taekvondo müsabiqəsindəki iştirakından, idmanın insanların həmrəylik hissinə necə təsir göstərə biləcəyindən söhbət açıb. O, həmçinin, Azərbaycanın Sülh və İdman təşəbbüsündə iştirak potensialını yüksək qiymətləndirib. Bu təşəbbüs Monako Şahzadəsi II Albertin rəhbərliyi altında həyata keçirilir və  Paskal Gentil isə özü bu təşkilatda Sülh naminə Çempiondur. 
Azərbaycan Respublikası Qaçqın və Məcburi Köçkünlərin İşləri üzrə Dövlət Komitəsinin sədr müavini Fuad Hüseynov: “Bu məsələ Azərbaycan üçün bir nömrəli problemdir. 25 il ərzində Fransa və Azərbaycan arasında mükəmməl münasibətlər qurulub. Hazırda əhalinin onda bir hissəsi köçkündür və bunun Azərbaycana böyük iqtisadi təsiri olub”. 
Azərbaycan Parlamentinin üzvü və vətəndaş cəmiyyəti təşkilatları vasitəsilə tərəflərin bir araya gətirilməsi məqsədi daşıyan yeni təşəbbüs olan Azərbaycan və Ermənistan arasında Sülh naminə Platformasının həmtəsisçisi Rövşən Rzayev: “Dağlıq Qarabağın azərbaycanlı əhalisi erməni həmkarları ilə dialoqun qurulmasını dəstəkləyir və məsələnin sülh yolu ilə həllini istəyirlər.
 
Yeni dialoq olmalıdır. Lakin Ermənistan tərəfi yeni Sülh Platformasının həyata keçirilməsi işinə dəstək vermək əvəzinə, əksinə müxtəlif əngəllər törətməklə məşğuldur. Ermənistan tərəfindən Sülh Platformasına dair bir dəfə də olsa müsbət cavab alınmayıb. Bu zaman isə hər gün “təmas xətti”ndə gənclər öldürülür. Bizim məqsədimiz sülh mesajı göndərməkdir.”
 
.
Özləri özlərini inkar edən tarixçilər haqqında.
Maraqlıdır, uzun illərdən bəri tədris olunan dərslik materiallarının mənbəyi göstərilmədiyi halda, opponentlərimiz təqdim etdiyimiz layihədə plagiat axtarır, nəinki öz həmkarları olan layihə müəlliflərini, həmçinin bu vaxtadək incimədikləri Təhsil Nazirliyini, peşəkarlıqlarına şübhə etmədikləri ekspert qruplarını, etik qaydaları aşaraq 37-ci ilin dili ilə xəyanətdə və anti-azərbaycançılıqda günahlandırır, kin-küdrətlərini, hirs və qəzəblərini boğa bilmirlər. Təbii ki, əks tərəfdə duran layihə iştirakçılarına qarşı qərəzsiz mövqe sərgiləmək, obyektivliyi, ədaləti qoruyub saxlamaq çətindir. Etik cəhətdən tenderə qoşulanlar belə qiymətləndirmədən könüllü olaraq çəkinib bu işi neytral mövqeyə malik institut yoldaşlarına həvalə etməli idilər. Bir qayda olaraq, opponent təqdim olunan iş haqqında öz rəyini 3 hissəyə ayırır: 1.  işin təhlili, müsbət cəhətləri (lap bir, yarım cümlə də olsa); 2. iradlar; 3. təkliflər. Təəssüf ki, AMEA Tarix institutunun rəyində nə I, nə də III hissə var. Yəni doğrudanmı layihəyə daxil edilmiş üst-üstə 350 səhifəlik materialın arasında xoş sözə layiq bir parça yoxdur? Müqəddəs Ramazan ayında bir qədər xoş niyyətli olmaq çox çətin idimi?
Opponentlər uzun illərdi tədrislə məşğul olan, dərsliklərin ekspertizasını həyata keçirən, müəllif komandaları ilə yaxşı tanış olan layihə müəlliflərini savadsız, düşmən adlandırırlar. Məmmədəli Hüseynovun xatirəsinə məqalələr yazanı ona qarşı sayğısızlıqda günahlandırır, “homo sapiens sapiens” (vergülsüz, iki dəfə: ağıllı ağıllı insan) ifadəsindəki təkrarı qüsur, səhv hesab edir, qədim dövlət qurumlarımızın yaranmasında İkiçayarası(Şumer) ilə mədəni-iqtisadi əlaqələrin təsirini həqarət sayır, erkən tayfalarımızın Şumerlə mal mübadiləsi aparmasını bilə-bilə “Şumer bazarına mal aparanlar” adlı ən uğurlu hesab etdiyimiz təsvirə belə kinayə ilə “bu şəklin nə mənası var” deyirlər… Hər işdə niyyətdən asılı olaraq düşmən tapmaq olar. Məsələn, hörmətli rəyçilərimizin məntiqi ilə çıxış edib soruşuruq: Dünya elmi ədəbiyyatında artıq “homo georgicus” (gürcü insanı) adını almış bir tapıntının Azərbaycanın tarix dərsliklərinə salınmasını təkid etməkdə məqsəd nədir? Bədxah qonşuların gündə bir əsər yazıb irsinə sahib çıxmaq istədikləri Aratta haqqında qısa mətnin dərsliyə salınmasına niyə belə kəskin etiraz edirsiniz?  Müəlliflərdən bunun izahını tələb etmək məgər çətin idimi? Nəzərə çatdırırıq ki, “En-Merkar və Aratta hökmdarı” adlı Şumer əfsanəsinin ilk tədqiqatçısı C.Kramer, tanınmış alimimiz Y.Yusifov (xüsusilə: VDİ, 1987, № 1, s.19-40), onun ardınca T.Qamkrelidze, V.İvanov və b. Arattanı məhz qədim Azərbaycan torpaqlarında, Zaqros dağ silsiləsinin mərkəzində, Urmiya gölü hövzəsində lokallaşdırmışlar. Bu fikrə qarşı çıxanların bircə alibiləri olub: Qədim dünyada lacivərd (lazurit) qiymətli daşı Əfqanıstanda (Bədəxşanda) olmuşdur. Lakin bu mülahizə tərəfdarları nəzərdən qaçırırlar ki, kiçik Uruk şəhəri bu qədər uzaq məsafədə olan ölkəyə qoşun göndərə, oranı işğal edə bilməzdi. Azərbaycanda – Səhənd dağında hələ qədimdən lacivərd yataqlarının olması haqqında orta əsr mənbələrində məlumatlara rast gəlməyimiz Aratta ilə bağlı fikirimizə bir daha aydınlıq gətirmişdir.
“Toxa əkinçiliyi”  ilə bağlı rəydə səslənən fikirdə də səmimiyyəti görmürük. Bununla bağlı mübahisələri nəzərə alaraq mətndə belə əkinçiliyin Eneolit dövründə yaranmasından deyil, inkişafından bəhs etmişik. Hələ ki, aparılan tədqiqatlar Azərbaycan ərazisində hələlik toxa əkinçiliyinin Neolit dövründə yaranmasını təsdiq edəcək nümunələr verməmişdir. Toxaşəkilli daş alətlər, sürtgəclər və s. isə əsasən yabanı bitkilərin toplanması, əzilməsi, yumşaldılması üçün istifadə olunmuşdur.
Hörmətli həmkarlar fikir bildirməzdən əvvəl heç olmazsa, Tarix institutunun nəşrlərinə göz gəzdirərdilər. Bu zaman onlar rəy verdikləri və məsuliyyətsiz halda “plagiat” adlandırdıqları layihədən danışmazdan əvvəl nümunə gətirdikləri dərsliklərin haradan köçürüldüyünün fərqinə varardılar. Rəylərdən elə təəssürat yaranır ki, Tarix institutunun nəşrlərindən yalnız bu institutun əməkdaşları dərslik yazarkən bol-bol istifadə edə, istədikləri mənbəni, materialı olduğu kimi köçürə bilərlər. Başqalarının isə bu yöndə düşünməsinə belə tabu qoyulur. Etiraf edirik ki, kiçik bir qrupun bütöv bir institutun BDU-dakı həmkarkarı ilə birlikdə apardıqları təbliğat qarşısında müqavimət göstərməsi həqiqətən çətindir. Amma bu müzakirələr ölkəmizdə tarix dərsliklərinin yazılması yollarına, təcrübəsinə yenidən nəzər salmağın, onların nə dərəcədə etibarlı olduğunu, necə, nə şəkildə yazıldığını, materialların mənbələrini araşdırıb yeni yayım üsullarından istifadə etməklə təhsil ictimaiyyətinə çatdırmağın zəruriliyini ortaya çıxardı.
Tarix institutunun rəyində Azərbaycan tarixi layihəsindəki bəzi mövzuların mətnindəki parçaların digər dərsliklərdən götürüldüyü iddia olunur. Aşağıda həmin dərsliklərdə “oğurluğa məruz qalan” materialların özünün haradan köçürüldüyünə dair bir neçə əyani nümunə göstəririk.

1.     Monqollar

2

Buradakı tərcümə səhvi də (“sənətkar kəndlilər içərisində” yox, ”sənətkarlar və kəndlilər arasında” olmalıdır) uzun illərdir ki, təkrarlanır.
 
Bundan başqa 10-cu sinif  "Azərbaycan tarixi” dərslik layihəsi ilə bağlı  tarixçi Dilavər Əzimli xəritələrin çoxu qüsurludur deyir. Hörmətli müəlimim və gözəl tarixçimizin nəzərinə çatdırmaq istəyirəm ki, həmmüəllifi olduğum dərslikdə istifadə olunmuş xəritələr Azərbaycan Respublikası Prezidentinin Sərəncamı və AMEA-nın bütün aidiyyati qurumlarının iştirakı  nəşr edilmiş “Azərbaycan Respublikasının Milli Atlası”ndan istifadə olunub. Belə çıxır ki, tarixçi Dilavər Əzimli AMEA-nın nəşr etdirdiyi “Azərbaycan Respublikasının Milli Atlası”nı elmi hesab etmir vı o akademiklərin fəaliyyətini qüsurlu hesab edir. Hörmətli tarixçi Dilavər Əzimliyə xatırladım ki, o Atlasın hazırlanmasında hamımızın ağsaqqalı, həqiqi vətənpərvər, tarixçi Akademikimiz Yaqub Mahmudovunda misilsiz xidmətləri var. Belə çıxır ki, Dilavər müəllim onun da fəaliyyətini qüsurlu hesab edir.
Bundan əlavə dərslik tenderində məğlub olmuş digər şəxs Leyla Hüseynova adlı birisi dərslikdə məqaləsində yazıb ki, dərslikdə "böyük Ermənistan” olduğuna əsassız arqument verən sətirlər olduğunu iddia edir. Mən onun yazdığından belə qənaətə gəldim ki, bu şəxsin tarixdən xəbəri yoxdur və hörmətli Akademikimiz Yaqub Mahmudovun redaktoru və müəllifi olduğu dərslikləri, o cümlədən VII sinif Azərbaycan Tarixi dərsliyini şübhə altına alır.
Leyla Hüseynova adlı birisi ola bilsin ki, indiyə qədər oxumayıb amma tövsiyyə edirəm ki, Tarix İnstitutunun direktoru, Akademik, Millət Vəkili Yaqub Mahmudovun müəllifi olduğu kitabları, və o cümlədən  525-ci qəzet.- 2015.- 4 iyul.- S.22.-də Azərbaycanın dövlətçilik tarixində Albaniya fenomeni məqaləsini, akademik Ramiz Mehdiyevin müəllifi olduğu "Dağlıq Qarabağ: məxəzlərdən oxunmuş tarix" (rus dilində) kitabı, VII cildlik Azərbaycan tarixi kitabını oxusun. Orda Mənbələr sırasında  Musa Kalankatlının Alban tarixi əsərinin adı çəkilib. Burdan mənbənin qoyulamsında nə qəbahət var?
Mən belə başa düşdüm ki, yuxarıda dını çəkdiklərim öz rəhbərlərinin fəaliyyətinə mənfi qiymət veriblər. Çünki biz dərslik hazırlanarkən onların redaktoru, müəllifi olduğu kitab, monoqrafiya və dərsliklərə istinad etmişik.

 Kamran Əsədov
Tarixçi Alim
 
.
Millət Vəkili Qənirə Paşayeva Tovuz sakinlərinə müraciət edərək onların probleminin qısa zamanda həll ediləcəyini bildirib.


Asiya.info xəbər verir ki, müraciətdə deyilir:

"Əziz Tovuzlular,
Bu gün sizin qaldırdığınız məsələləri ölkəmizin Baş Naziri Artur Rəsizadənin diqqətinə çatdırdıq və inanırıq ki yaxın günlərdə müsbət addımlar olacaq.
Əziz Əlimərdanlı, Qaraxanlı, Xatınlı, Qədirli, Cilovdarlı, Düzcırdaxan, Cəlilli sakinləri. Son 3 gündə onlarla sakinimiz zəng edərək indi yazacağım məsələ ilə bağlı müraciətlər etdiyi üçün buradan bütün sakinlərimizi maraqlandıran məsələni diqqətə çatdırmaq istəyirəm. Kəndlərimizə yağan güclü dolu nəticəsində çoxlu sayda evlərin dam örtüyünün tamamilə yararsız vəziyyətə düşməsini kəndləri gəzərək, sizinlə söhbət edərək yerində də gördüm. Üzləşdiyiniz çətinliklərə sizin qədər üzüldük. Və sizin yağan yağışların evləri tamamilə yararsız vəziyyətə salmaması üçün hökumətdən qısa zamanda şiferlə yardım göstərilməsi xahişinizi bu gün Baş Nazir Artur Rəsizadənin diqqətinə çatdırdım. Baş nazir Artur müəllimə çox təşəkkür edirəm ki müraciətimizə təcili cavab verdi və bu gün sizi təmsil edən millət vəkili olaraq məni qəbul etdi və məsələləri geniş şəkildə çatdırmam üçün geniş zaman ayırdı. Sizin sıradan çıxmış dam örtüklərinin düzəldilməsi üçün hökumətimizdən şifer yardımı edilməsi xahişinizi sizin və öz adımdan Baş nazirin diqqətinə çatdırdım və xahiş etdim. Eyni zamanda sizin qaldırdığınız bütün fikirləri də Artur müəllimə çatdırdım. Baş nazir bildirdi ki hər zaman oldğu kimi dövlətimiz çətin vəziyyətdə qalan insanlara dəstək göstərilməsi üçün addımlar atacaq. Bu cür insanların hər zaman Dövlət Başçımızın xüsusi diqqətində olduğunu bildirən Baş nazir Artur Rəsizadə təbii fəlakət nəticəsində evlərinin damı yararsız vəziyyətə düşmüş Tovuz sakinlərinə şifer yardımı edilməsi istiqamətində addımlar atılacağını bildirdi. Bu gözəl gecədə bu xəbəri gözləyən onlarla ailəmizin olduğunu bilirəm. İnşallah yaxın günlərdə bu dəstəyin olacağına inanırıq. Allah dövlətimizə və millətimizə hər zaman yardımçı olsun".
.
Ədliyyə Nazirliyi ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarovun vəkillərinin onun səhhətində yaranmış problemlərlə bağlı səsləndirdiyi fikirlərə münasibət bildirib.

APA-nın xəbərinə görə, Ədliyyə Nazirliyinin İnsan hüquqları və ictimaiyyətlə əlaqələr idarəsinin rəisi Faiq Qurbanov deyib ki, Ədliyyə Nazirliyinin Tibb Baş İdarəsinin peşəkar həkim - mütəxəssislərinin Akif Çovdarovun səhhətinə hər zaman həssas yanaşırlar.

“Bu məsələyə tam məsuliyyətlə yanaşılır. Müraciətlər olunursa, heç vaxt reaksiyasız qalmır”, - deyə o vurğulayıb. 

Qeyd edək ki, A. Çovdarovun vəkilləri onun səhhətində problemlərin olması ilə bağlı Ədliyyə Nazirliyinə etdikləri müraciətlərin cavabsız qaldığını bildirmişdilər. 
.
İlya Plexanov
inosmi.ru, 21.06.2017
 
Praktik olaraq bur həftə də keçmir ki, İran və ABŞ bir-birini acılamasın. İran kater, təyyarə və dronları Fars körfəzində Amerika gəmilərinə dinclik vermir, hər iki ölkə diplomatları etirazlar ifadə edir, ABŞ və İran siyasətçiləri bir-birini gərginliyi gücləndirməkdə ittiham edir, Donald Tramı öz tivitterində İran haqda daha nələr yazmayıb, ABŞ Suriyada Ət-Tənfənin girişində İranyönlü bölmələri bombalayır, Amerika Senatı İrana qarşı yeni sanksiyalar tətbiq edir, İran Ali lideri Əli Xameneideyir ki, “Amerika terrorçular ölkəsidir və terrorçuları müdafiə edir”. Buna hamı artıq alışıb və hesab olunur ki, ABŞ və İran 1979-cu ildən qırılmış diplomatik münasibətlərlə barışmaz rəqiblərdir.
Lakin ictimaiyyətə səs-küylü siyasi deyimlər və fəaliyyətdən savayı hərbçilərin ümidi var ki, iki ölkə arasında gec-tez başqa münasibətlər də – kommersiya – qaydasına düşəcək.
İranın Aseman Airlines aviaşirkəti artıq Donald Tramp vəzifəyə başladıqdan sonra bu ilin aprelində Amerikanın Boeing şirkətindən 3,4 milyard dollar məbləğində 30 Boeing-737 təyyarəsinin tədarükü üçün ilkin saziş imzalayıb (hələ 30-u da əlavə alına bilər). Təyyarələr 2022-ci ildən İrana gəlməlidir.
Boeing artıq buna qədər sanksiyaların götürülməsi ilə 2016-cı ilin dekabrında İranın IranAir şirkətinə 16,6 milyard dolar məbləğində 80 təyyarə satmaq haqda saziş bağlayıb, yeni sifarişlərdən savayı İranın köhnə təyyarələrinin mühərrikinin təmirini aparır. Aseman Airlines-la saziş isə Amerika şirkətinə 18 min iş yeri verəcək və prezident Tramp Boeing-lə İran aviaxətlərinin münasibətlərini aşkar şəkildə müzakirə etməməyə üstünlük verir.
İran əvvəllər bildirib ki, ölkəyə 500 yeni mülki avialayner lazımdır. Bu, böyük puldur. Lakin qeyd etmək lazımdır ki, təyyarələr hələlik tədarük edilməyib (ilk tədarük 2018-ci ildə gözlənilir) və sazişlərin həyata keçirilməyi sual altında qalır. Çünki ölkələr arasındakı kommersiya münasibətləri həm ABŞ-da, həm də İranda siyasi elitalar arasında zorla qopma doğurur. ABŞ-da hesab edirlər ki, IranAirİslam İnqilabı Keşikçiləri Korpusu tərəfindən təşkilat üzvlərini daşımaq üçün istifadə olunur, İranda isə hiddətlənirlər ki, İranın pulları “amerikalıların gödənini doyuzdurmağa” gedir.
Buna baxmayaraq, həm İranda, həm də ABŞ-da dəfələrlə ifadələr səsləndirilib ki, Tramp administrasiyası biznesmenlər administrasiyasıdır və daha fəal ticarət münasibətləri qurmaq ümidi verir.
ABŞ mayda İrandakı müəyyən şəxslər və İranın raket proqramına yardım edə biləcək Çin şirkətlərinə qarşı sanksiya tətbiq edib. Lakin, BBC-nin yazdığı kimi, bununla yanaşı Tramp yenilənməsi tələb olunan bir sıra digər sanksiyaların vaxtını uzatmayıb.
2006-2016-cı illərdə ABŞ və İran arasında ticarət dövriyyəsi on il ərzində üç milyard dollar təşkil edib. Müqayisə üçün – münasibətlər kəsilənə qədər 1978-ci ildə dövriyyə 6,7 milyard dollar təşkil edib. Sanksiyalar götürüldükdən sonra ABŞ-da fars xalçalarının satışı 8 dəfə, incəsənət əşyalarının satışı isə 2 dəfə artıb. Söz düşmüşkən, İran xalçaçılıq sənayesində 700 minə yaxın adam çalışır. ABŞ İrandan xalça və əntiqdən başqa kürü də alır.
ABŞ öz növbəsində İrana dərman, taxıl, düyü, soya, qarğıdalı, süd məhsulları, şokolad, taxta, ətriyyat və hətta damazlıq öküz sperması tədarük edir. Təbii ki, hər şey cüzi şəkildədir.
İran bazarı Amerika şirkətləri üçün dadlı tikədir. Bütün antiamerika ritorikasına baxmayaraq, İran istehlakçısı Qərb həyat tərzinin təsiri altındadır. Amerika şirkətləri kübar ətriyyatı və kosmetika, brend qadın geyimi, məişət elektronikası və kompüter texnikası (Apple məhsulu), avtomobil, tütün məhsulları, fast-fud və pop musiqi bazarlarında öz payını tuta bilərdi. Bütün bunlar İrana onsuz da qeyri-leqalcasına böyük həcmdə tədarük olunur və ya ölkədə və yaxud bölgədə lisenziyasız istehsal edilir. Amerika şirkətləri öz saatını gözləyir.
Burası da var ki, Dell şirkəti İranın Almaniya və Fransa səfirliklərinə bir neçə min avroluq kompüter sataraq bununla da sanksiya qaydalarını pozmaqda ittiham edilərkən adamın gülməyi gəlir.
Qaldı ki, təyyarələrə, yeri gəlmişkən, avropalılar da Boeing-dən geri qalmırlar. Airbus da artıq İrana təyyarə tədarük edir. IranAir üç təyyarə alıb, bu arada İrana ATR şirkətindən 20 turbovintli təyyarə tədarükü üçün danışıqlar gedir.
İran prezident Həsən Ruhaninin 2016-cı ildə Avropa səfəri nəticəsində İran 40 milyard dollarlıq müqavilə bağlayıb. İtaliya və Fransa şirkətləri ağır texnika, neft-qaz kompleksi üçün avadanlıq tədarükünə başlamalı, İran avtomobil zavodları və Tehran, Məşhəd aeroportlarında terminal inşasına qatılmalıydı. Norveç, Avstriya, Almaniya və başqa ölkələrin şirkətləri 2016- cı il boyu İranın neft-qaz, metallurgiya və nəqliyyat sahələrində iş üzrə qarşılıqlı anlaşma haqda dalbadal müqavilələr imzalayıb. Bu sazişlərin bir qismi gerçəkləşməyə başlayıb. Məsələn, İtaliyanın dünyada metallurgiya sənayesi üçün aparıcı tədarükçülərdən biri Danieli qrupu bu il mayda 40 milyon dollar qoyaraq Tehran ətrafında Danieli Persia zavodunu işə salıb.    
İran və Avropan şirkətləri arasında iqtisadi münasibətlərin inkişafına əsas maneə gəlir və yaxud fayda deyil, bankların İranla iri məbləğ sövdəsi aparmaq istəksizliyidir. Bu, birinci növbədə o cümlədən Amerikada da fəaliyyət göstərən banklara aiddir. Onlar qorxur ki, Amerika hökuməti cərimə və sanksiya qoyub əməliyyatı məıhdudlaşdıraraq nüfuza ləkə salar.
Və bu, boş hədə deyil. Məsələn, 2014-cü ildə Fransa BNP Paribas bankı sanksiyaları pozmaq üzündən 9 milyard ABŞ dolları ödəməyə məcbur olub və bir il ərzində dollar əməliyyatı aparmaqdan qismən məhrum olub.
Bununla belə, bu sahədə də don açılır. İran iyulda çirkli pulların yuyulması üzrə mübarizə üzrə Hökumətlərarası təşkilatın (FATF) “qara siyahı”sından çıxdaş olunacaq, mayda isə İranın Saman Bank-ı İtaliya tənzimləyicilərinin icazəsi ilə İtaliyada öz ofisini açıb. Bu, İranla AB arasında biznes aparmağı güclü şəkildə asanlaşdırmalıdır. İranla AB arasında mal dövriyyəsi 2017-ci ilin birinci rübündə  5,3 milyard avro təşkil edib. Və dövriyyələr ancaq çoxalır. Avropa nə zamansa daha müstəqil xarici siyasət apara bilsə, onda İranla münasibətləri sürətlə normallaşdırmağa bütün şanslar var.
 
Tərcümə Strateq.az-ındır.  
 
.
Millət vəkili Q.Paşayeva Düz Qırıqlıda sakinlərlə görüşüb və müəllimlərin müraciətini Təhsil Nazirliyi ilə müzakirə edəcəyinə söz verib. 


Asiya.info bildirir ki, Millət vəkili Qənirə Paşayeva Tovuzun ən böyük kəndlərindən olan Düz Qırıqlı kəndini ziyarət edib, sakinlərlə görüşüb, qayğı və problemləri ilə maraqlanıb.Millət vəkili sakinlərlə görüş zamanı ona müraciət edən xəstələrin yüksək səviyyəli müalicə almaları və əməliyyat olunmaları üçün Səhiyyə Nazirliyi ilə əlaqə saxlayaraq Bakıda və ya Rayon Mərkəzi Xəstəxanasında yerləşdirilməsini təşkil edib. Millət vəkili Qənirə Paşayeva həmçinin həmin kəndlərdə fiziki imkanları məhdud insanlarla da görüşüb, onların qayğıları ilə maraqlanıb və bu istiqamətdə Əmək və Əhalinin Sosial Müdafiəsi Nazirliyinə müraciətlər edib. Sakinlər millət vəkili ilə görüşdə ünvanlı sosial yardıma ehtiyac olan insanların daha çox olduğunu bildirərək ona müraciət ediblər və o da bununla bağlı rayonda bu sahəyə cavabdeh qurumla müzakirələr aparıb. Sakinlər özəlliklə iş yerlərinin artmasına xidmət edən layihələrə böyük ehtiyac olduğunu xüsusi vurğulayıblar. Millət vəkili vətəndaşları tək-tək dinləyərək, onları narahat edən problemlərlə bağlı qeydlər apararaq, həll edilməsi istiqamətində köməklik göstərilməsinə çalışacağını bildirib. Millət vəkili onların bəzi problemlərinin həlli istiqamətində müvafiq qurumlarla danışacağını və onların bəzi təkliflərini parlamentdə səsləndirəcəyini də deyib. Millət vəkili Qənirə Paşayeva Tovuzda şəhid Nağı Əmiraslanov adına Düz Qırıqlı kənd orta məktəbinin müəllimlərinin müraciəti əsasında məktəbi də ziyarət edib, müəllimlərlə görüşüb, onların müraciətlərini yerində dinləyib. Müəllimlər və valideynlər Təhsil nazirliyi tərəfindən məktəbin bağlanması, müəllim və şagirdlərin digər məktəbə köçürülməsi ilə bağlı verilən qərarla bağlı onları narahat edən bəzi məqamlarla bağlı fikirlərini bildiriblər. Təhsil nazirliyinin nümayəndələrinin də iştirak etdiyi görüşdə nazirlik rəsmiləri müəllim və valideynləri narahat edən suallara aydınlıq gətirib, geniş müzakirələr olub. Millət vəkili Q.Paşayeva müəllim və valideynləri narahat edən məqamlarla bağlı Təhsil nazirliyinin rəhbər şəxslərinə təkrar müraciət edib, müzakirə aparılıb. Onlar bildiriblər ki, müəllimləri və valideynləri narahat edən bütün məsələlərin öz həllini tapması üçün addımlar atılacaq. 


Millət vəkili Q.Paşayeva Düz Qırıqlıda  sakinlərlə görüşüb
Millət vəkili Q.Paşayeva Düz Qırıqlıda  sakinlərlə görüşüb
Millət vəkili Q.Paşayeva Düz Qırıqlıda  sakinlərlə görüşüb
Millət vəkili Q.Paşayeva Düz Qırıqlıda  sakinlərlə görüşüb
Millət vəkili Q.Paşayeva Düz Qırıqlıda  sakinlərlə görüşüb
Millət vəkili Q.Paşayeva Düz Qırıqlıda  sakinlərlə görüşüb
Millət vəkili Q.Paşayeva Düz Qırıqlıda  sakinlərlə görüşüb
Millət vəkili Q.Paşayeva Düz Qırıqlıda  sakinlərlə görüşüb

Xəbər lenti